【中日韓筷子大不同 原來背後有典故】

亞洲飲食文化中，筷子係餐桌上必不可少嘅餐具。從筷子中便可以睇出唔同國家嘅文化差異，比如韓國筷子設計得又扁又重，究竟係點解呢？

中國

• 材料：多樣化，比如塑膠、竹子等
• 形狀：又長又厚

中國家庭食飯多數圍住一張大圓檯，而且亦習慣夾餸俾其他人，因此長筷子使用上更方便。

日本

• 材料：木製
• 形狀：短身尖頭

不同於中國文化，喺日本文化中，夾餸俾人同火葬後撿骨嘅動作相似，係一種非常不吉利嘅行為！所以日本人多數係獨立進餐，自己一份飯餸，因此短筷子已足夠；另外，日本主要食物有壽司、海產等，尖頭筷子的設計更方便撥開食物及剔除魚刺。

南韓

• 材料：金屬製
• 形狀：又薄又扁

韓國料理多以湯類為主，容易沾濕的筷子在韓國人眼中不太衛生，使用金屬筷子便無須擔心呢個問題。至於扁狀設計，有指是因為韓國人經常使用移動式檯仔擺放餸菜，再搬出客廳進食，扁平的筷子便可以防止滾動滑落。